បារាំង៖ នាយករដ្ឋមន្ត្រីកម្ពុជា សម្តេចតេជោ ហ៊ុន សែន បានអញ្ជើញដឹកនាំគណៈប្រតិភូកម្ពុជាទៅដល់អាកាសយានដ្ឋានអន្តរជាតិ Paris Charles de Gaulle ទីក្រុងប៉ារីស ប្រទេសបារាំងនៅយប់រំលងអធ្រាត្រម៉ោង ១និង៤៥នាទីម៉ោងនៅទីក្រុងប៉ារីស ដែលត្រូវនឹងម៉ោង៧នឹង៤៥នាទីព្រឹកម៉ោងនៅកម្ពុជាថ្ងៃទី១៣ ខែធ្នូ ឆ្នាំ២០២២។

សម្តេចតេជោ បានអញ្ជើញមកដល់ទីក្រុងប៉ារីស បន្ទាប់ពីសម្តេចបានបញ្ចប់កិច្ចសំណេះសំណាលជាមួយពលរដ្ឋ ខ្មែរដែលរស់នៅក្នុងទីក្រុងព្រុចស៊ែល ប្រទេសប៊ែលហ្ស៉ិកកាលពីយប់ម៉ោង១០កន្លះយប់ ម៉ោងនៅកម្ពុជានាថ្ងៃទី១២ ខែធ្នូ ឆ្នាំ២០២២។

ការអញ្ជើញដល់របស់ សម្ដេចតេជោ នាយករដ្ឋមន្ត្រី និងគណៈប្រតិភូ គឺត្រូវបានទទួលស្វាគមន៍យ៉ាងកក់ក្ដៅពីមន្ត្រីជាន់ខ្ពស់របស់បារាំង និង មន្ត្រីការទូតកម្ពុជា ប្រចាំនៅបាំរាំងជាច្រើនរូប។

តាមការគ្រោងទុក ក្នុងពេលបំពេញទស្សនកិច្ចនៅក្នុងប្រទេសបារាំង សម្ដេចតេជោ ក៏នឹងអញ្ជើញចូលរួមសន្និសីទគាំទ្រភាពធន់នៃប្រជាជនអ៊ុយក្រែន កិច្ចប្រជុំក្រុមប្រឹក្សាសហគ្រាសកម្ពុជា-បារាំង និងពិធីលៀងសាយភោជន៍ ជូនសម្ដេចតេជោ និងគណប្រតិភូ ដែលរៀបចំឡើងដោយប្រធានាធិបតីបារាំង៕